E wèpsait akí ta trata kantika di mucha. Bon dia goeiemorgen ta e título di un kansion di e famoso Rudy Plaate. E kansion akí ta bilingwe, na papiamentu i na hulandes. Kòrsou, Aruba i Boneiru ya kaba pa 400 aña ta forma parti di Reino Hulandes, sinembargo masha tiki hulandes konosé papiamentu. Riba e wèpsait akí tin hopi kantika pa bo por kanta na papiamentu i na hulandes. Bo por siña algu históriko di e islanan i tokante e kantikanan di mucha. Tin videonan di karaoke, plachi pa klùr i kosnan agradabel pa bo sa di dje.
Disfruta!
FECHANAN DI PRESENTASHON BON DIA, GOEIEMORGEN 2024
14 februari Schoolvoorstellingen Wijk bij Duurstede (besloten)
15 februari Schoolvoorstellingen Wijk bij Duurstede (besloten)
20 februari Podium Hoge Woerd - De Meern, Utrecht
10 maart KAF, Almere
24 maart Het Kielzog Theater, Hoogezand- Sappermeer
13 april Musis & Stadstheater, Arnhem
14 april Leidse Schouwburg, Leiden
21 april Schouwburg Concertzaal Tilburg
27 mei Schoolvoorstelling Tilburg (besloten)
28 mei Schoolvoorstelling Tilburg (besloten)
E rekorido teatral akí ta posibel danki na kontribushon di parti di Prins Bernard Cultuurfonds i Norma fonds.
For di chikitu Izaline Calister tabata gusta kanta, anto kanta hopi, entre otro den kor di mucha Perlitas. El a skohe 23 kantika di mucha, for di tempu di su hubentut, di kompositornan konosí manera Rudy Plaate, Richard Simon i Padu Lampe di Aruba.
Pa duna e kantikanan mas popularidat na Hulanda, el a laga e.o. Koos Meinderts adaptá e tekstonan na hulandes. Izaline ta kanta e kantikanan na tur dos idioma. E CD ta bini ku un buki (210 x 210 mm, di 48 página) ku tur letra den dos idioma i ku ilustrashon alegre.
Pa Pedido
Por hasi pedido pa e buki Bon dia goeiemorgen inkluso e CD depositando €17,50 riba number di kuenta:
NL02ABNA0572508395
Na nòmber di I.F.J. Calister na Groningen.
Menshoná e título, Bon dia goeiemorgen i porfabor no lubidá di menshoná un direkshon di entrega na Hulanda. Si ta deseá un mayor kantidat, menshoná esaki i multipliká e suma. Lo entregá e buki inkluso e CD algun dia despues di e pedido.
Na Kòrsou por kumpra e buki na Bruna Bookstore den Zuikertuin Mall.
X
Aruba ta e isla di mas chikitu di e tres islanan abou, algu mas grandi ku Waddeneiland Texel. Boneiru ta mas o ménos dos biaha mas grandi ku Texel i Kòrsou dos i mei biaha mas grandi. Kompará ku e Waddeneilanden, e tres islanan ta keda hopi mas separá for di otro. Si Boneiru tabata situá den IJsselmeer (loke ta posibel), Kòrsou lo a keda djis dilanti di kosta di Noordholland i Aruba mas serka di Inglatera den Noordzee.
Kòrsou tin mas o ménos mes tantu habitante ku Haarlem, brutu bisá un porshentu di e kantidat total di habitantenan di Hulanda. Aruba ta mes grandi ku Maastricht (120.000) i Boneiru ta komparabel ku e munisipionan Weesp, Urk i Ommen (20.000).
Na tur tin 300.000 habitante riba e tres islanan. Na Hulanda tin 110.000 antiano ta biba. No ta nan tur ta papia papiamentu; ta un promedio di 300.000 ta papia papiamentu. Esei ta parse tiki, pero apesar di esei, e idioma su kultura di kantika i músika ta riku.
X
E kèrki di mas bieu na Kòrsou ta Fortkerk. E tin mas di 250 aña. Ta un misa protestant, ta mas despues a konstruí e snoanan hudiu i misanan katóliko. E kèrki ei yama Fortkerk, pasobra e ta situá den Fort Amsterdam. A konstruí e fòrti pa defendé entrada di e bahia di mas importante di e isla.
E kantika Oloshi Kèns ta trata di un oloshi ku ta bati 13 biaha na lugá di 12 bia. Riba e ilustrashon gráfiko, esaki ta robes manera e kansion ta indiká. E kantika ta trata di un hende ku no ta muchu sigur si ta e oloshi ta bruá òf si ta e mes ta bruá. Si bo paga bon tinu, bo ta mira te ariba den trasfondo, e tènkernan di zeta ta nabegá drenta Bahia Santa Ana.
X
E islanan Kòrsou, Aruba i Boneiru no tabata ideal pa agrikultura. Áwaseru no tabata kai sufisientemente i mayoria di biaha tabata demasiado seku pa planta maishi òf berdura. Pa hopi hende piskamentu tabata un solushon. Aunke laman rondó di e islanan ta peligroso ku e koriente fuerte i olanan altu, semper piskamentu tabata mashá importante. Hopi antiano a riska subi laman ganchu den boto chikitu pa piska.
E kantika Piskadó ta trata suerte ku bo mester tin ora bo bai piska, pasobra danki na un bon kosecha bo por alimentá bo yunan. Esaki ta e kantika faborito di Izaline Calister. Su tata tabata un piskadó ferviente; e tabata stima laman. Preferiblemente e tabata bai den su boto chikitu ku su kompañero fiho di piska, Kompader, òf ku un yu hòmber òf ku su suegro, henter dia riba laman. E tabata satisfecho ku tur loke el a piska, sea ta un purunchi chikitu òf un buní grandi.
Otro piská konosí ku ta mashá gustá ta masbangu. Ta un piská poko mas chikitu ku ta landa den mancha, esta den grupo. Ku hopi esfuerso bo por logra piska henter un mancha asina.
Un kuenta di famia tokante piskamentu di masbangu:
Tata Dèni tabata planta berdura, pero e tabata piska tambe. E tabata doño di un reda masha grandi mes. E reda tabatin un grandura di desénas di meter. Tata Dèni tabata usa esaki pa piska mancha di piská chikitu. E mes a traha e reda i ora un parti dje reda kibra, e mes a drech’é. Pasobra e reda tabata asina grandi, el a paga hopi plaka pa e kabuya pa traha e reda kuné i e mester a traha hopi tempu pa kab’é. Na e parti ariba di e reda el a pega flotante trahá di kalbas bashí. Na e parti abou el a pega piedra i krakstenchi.
El a piska ku un tim di bisiña i famia. E grupo di Tata Dèni tabata konsistí di Wansitu Sareu, Manuel Chancha, Shon Kai Chikí i Kalitu Grandi. Ku boto chikitu, nan a subi laman, djei nan tabata rondoná un mancha di piská, saka e reda for di e botonan pa lag’é kologá te den fondo di laman. Halando e reda mas fuerte nan a hala e piskánan serka di otro. Te ku e piskánan tabata landa asina serka di otro ku tabata fasil pa kue nan. Asina e piskadónan a logra esei, nan a ankra e reda. Tin biaha tabatin kref den e reda i asta turtuga.
Durante e siguiente dianan nan tabata saka e piskánan for di e reda. Un mancha di masbangu asina ta bal hopi plaka; por a bende e piskánan pa desénas di florin pa un hèmber yen. Ta p’esei tambe mester a vigilá e reda yená di dia i anochi. No únikamente kontra hende, pero tambe kontra piskánan di presa, ku por a destruí e reda pa asina kome e piskánan será den e reda. Ora opservá un mancha di piská den St. Jorisbaai, a tuma akshon mesora. Otro hende por a yega promé ku bo i kuminsá pleita, ta ken t’esun ku a deskubrí e mancha promé. Tambe tabatin e tim di Shak’i Popo. E tambe tabatin gana di kue e mancha di piskánan. E tabata manda su yunan kuchikuchi bai kòrta bo redanan, ku tabata kologá pa nan seka.Tin biaha polis mester a presenta pa disidí ken t’esun ku por a sali pa kue e masbangunan.
X
Kasnan na Kòrsou, Aruba i Boneiru ántes tabata habrí, no ta tin glas dilanti di e bentananan. Ainda tin kasnan ku tin gran parti di e habrí. Tabata fèrf murayanan di kushina kòrá ku bala bala blanku, pasobra a deskubrí ku muskita no ta gusta esei i e orei nan no ta bin para riba e murayanan mas.
X
E entrada pa barku drenta haf di Kòrsou yama Bahia Santa Ana. Ta un brasa di laman, ku ta dividí Willemstad den diferente bario. Tin dos brùg ku ta uni e dos partinan di siudat ku otro. E brùgnan ta karga nòmber di reinanan hulandes. A konstruí e promé brùg tempu Emma tabata reina na Hulanda i e otro tempu Juliana tabata reina. E brùg di mas nobo, brug Juliana, ta un brùg basta altu, riba kua tráfiko motorisá ta pasa i bou di dje tankeronan petrolero por pasa. Emmabrug, esun mas bieu, ta un brùg largu ku ta drif riba awa, riba kua outo no mag pasa mas. Ora tin krusero òf tankero ku mester drenta haf, e brùg akí ta move pokopoko hala na banda riba flotantenan grandi, e asina yamá pontonnan. Ora pasa riba e brùg di ponton na pia bo por sinti kon superfisie di e brùg ta subi baha segun e olanan ta move.
Antes Emmabrug tabata un brùg di peahe, loke ta nifiká ku mester a paga pa por pasa riba dje. Ma si bo pasa riba e brùg pi’abou, bo ta pasa grátis. Hende pober no ta’tin nodi di paga. Tin biaha hulandesnan ku ke ta ekonómiko tambe tabata kita nan sapatu pa nan no mester paga. Algun yu di Kòrsou orguyoso, hustamente tabata kana ku nan sapatu riba brùg pa laga sa ku nan sí por a paga e peahe.
Na man drechi riba e ilustrashon gráfiko bo ta mira Riffort, manera e tabata 100 aña pasá i kompletamente na man robes Fort Amsterdam. A konstruí tur dos fòrti na entrada di haf pa defend’é kontra barkunan enemigu.
Mama i yu ta kana riba Emmabrug pia abou. Nan a kaba di yama e tata, ku ta traha komo nabegante riba un barku, ayó. E kantika Stul di rit ta tokante esei, ku nan ta soña ku e tata lo bolbe bèk ku muebel bunita i otro kosnan pa nan kas.
Kantikanan hulandes hopi bia ta kanta tokante awaseru. Abo konosé un kantika tokante awaseru?
Kòrsou, Aruba i Boneiru ta keda den zona tropikal i p’esei semper ta kalor. Tin bia te asta por bira 30º Celsius! P’esei hopi kantika ta kanta tokante solo. Kantikanan ku ta trata solo ku ta sali, e solo kayente di den dia òf ora solo ta baha.
Un kantika mashá konosí di Kòrsou ku ta trata ora solo ta baha ta Atardi. Izaline i Thijs ta tok’e aki.
Atardi
Atardi Kòrsou ta bunita
Ora ku solo ta baha
Ora tur para ta kanta felis
Promé ku nan bai sosegá
Atardi para kant’i playa
Un goso ta yena nos alma
Ta manera nos isla ta hal’un rosea
P’e yama e dia ayó
Pero atardi tambe tin tristesa
Or’e dia ta yega su fin
Ta manera un parti di nos ta bayendo
i hamas nos lo bolbe mir’é
Fiesta den kurá ta un kantika ku ta trata sonidonan ku bo ta skucha den oranan di anochi den kunuku na Aruba. Ora awaseru kai bo ta tende flüitmentu di sentenar di sapu, ku ta tené bo lantá ku nan tono fuerte i skèrpi. E sapunan ta masha hopi i e sonido ku nan ta produsí ta un kakafonia di pitu. Tambe semper bo ta tende kriki ta grita. Segun Padu Lampe, e kompositor Arubano di e kantika akí, e bestianan ta baila riba e músika di e orkesta di sapu i kriki.
Dori ta pita, yeye ta grita
Baka ta balia, cha-cha-cha
Pushi ta yora, djaka ta lora
Porko ta gruña, ‘Ho’
Kikkertjes swingen, krekeltjes zingen
Koe die danst de cha-cha-cha
Poes loopt te draaien, ratten te zwaaien
Varken moppert: ‘Ho!’
Kanta huntu ku nos!
X
Tin un animal ku ta na Kòrsou so bo ta mir’é. Ta un tipo di animal ku nos ta yama biná na papiamentu. E kantika Kabuya ta anima buladónan pa bula manera un biná.
X
E yuana bèrdè ta un tipo di lagadishi grandi ku ta kome mata, ku spiña riba su lomba i na su garganta. Nan ta subi altu den palu i kaktus i ta lastra riba nan barika den tera. Muchanan ku chincha ta tira riba nan den mondi i sakanan for di palu, nan ta kore nan tras i kue nan. Hopi mucha riba e islanan ta bai nan tras i purba kue nan, pasobra esaki ta un forma bon i agradabel pa gana un tiki plaka. Un yuana gordo bunita bo por bende. Por traha sòpi di e karni di yuana, lokual hende hòmber gusta mashá. Tin bisá ku e karni di yuana ta sòru pa sierto forsa spesial. Hopi hende muhé antiano si no ke tin nada di hasi kuné.
Yuana ta parse pokopoko ora nan ta drumi pa kue solo, pero kuidou, nan por ta hopi feros. Nan tin tengla largu ku uña skèrpi i si bo tene nan robes, nan por habri bo pòls i mannan na sanger.
Kon ta kue yuana, un historia di famia
Tempu Thomas tabata mucha chikitu, e tabata yuda su mama piki palu riba tereno di Plantashi Choloma. Esei tabata kosta dies plaka pa adulto i un depchi pa mucha. Bo por a piki kuantu palu ku bo por a karga. Pero den skondi Thomas tabata kue yuana tambe i skonde nan den e palunan ku e tabata karga riba su kabes. Un yuana asina por a bal 2,50. Hopi biaha tata Dennie ta kumpra e yuananan.
Bo mester tin bon bista sí. No ta tur hende por a mira e yuana bèrdè den e takinan di yerba altu òf sintá den palu. Pero si bo mira un, bo ta kue bo chincha i lòs algun piedra. Preferiblemente na su kabes. Si bo logra dal e bon, e ta kai for di e taki. Mayoria bia e bestia ta keda djis un tiki zonzá, i una bes na suela e ta kuminsá lastra sakudí i drai rònt. Bo mester ta lihé, sino bo ta pèrd’é. Mester ten’é na su lomba, djis dilanti su pianan patras. Esei ta hopi importante, sino bo ta kore risku ku e ta hinká bo ku su tenglanan skèrpi i uñábo na bo pòls òf na bo brasa i poné bo sangra.
Ora un yuana ta move riba su barika den tera, tin bia lo bo por kue fásilmente, basta bo ta hopi lihé i ketu. Prinsipalmente mainta ora no ta kayente ainda, tin bia esei por logra mas fásil. E bestianan akí ta di sanger friu i e ora mainta ei ainda nan no ta dje lihé ei. Pero dado kaso esei no logra, entre boso dos boso por purba chang’é. Un ta yag e bestia den direkshon di e palu òf kontra un datu, unda e otro ta para ward’é. Manera e yuana purba subi palu, e otro por kité for di e palu. Pero e otro mester ta skondí sí tras di e palu, pasobra di mes si e yuana mira un hende ei pará, e ta kore limpi bai.
Bo ta mara su pianan dilanti i patras huntu ku poko yerba largu, na moda ku e no por kana bai. Tambe bo por kibra su pianan manera indjannan Caquetio -habitantenan original di e islanan- tabata sa hasi. E ora ei bo ta hink’é den un saku di pita i karg’é riba bo skouru bai kas kuné. Yuananan ta sapatiá riba bo lomba. Ku poko mas suerte bo por kue dos pa tres den un ora di tempu; prinsipalmente tras di Dam Pretu ta’tin masha hopi. Kachó tambe por yuda yag yuana. Por siña nan gara nan sin ku nan ta morde nan mata òf kibra nan kurpa.
Na kas bo ta bende e yuananan ku tata Dennie, kende ta warda nan den un barí, te ora Ma Victorine òf Maj Nene tin tempu pa kushiná sòpi. Ku su kuchú di mas skèrpi Tata Dennie ta mata nan. Promé e ta kita e kabes afó i despues e ta skamanan. Den un èmber ku awa e ta laba nan i kita santu ku lodo. Ta kita e tenglanan i e uñanan i e punta fini di e rabu, kaminda no tin mashá karni. Ora kòrta e barika habri, esaki ta produsí un oló fuerte. Ta dera e tripanan i e tenglanan òf benta nan afó, ku eksepshon di e igra. Ta kushiná e igra i duna e kachó kome pa pasaboka, komo rekompensa ku el a aportá na kwe e yuananan. Esaki ta un delisia pa e kachó i e siguiente biaha e ta aportá mihó ainda na yagmentu di yuana.
Mira aki un reseta di sòp’i yuana.
X
Willemstad ta e kapital di Kòrsou. E ta konsistí di diferente parti ku ta separá pa awa. Promé ku a konstruí un brùg, mester a krusa ku un ponchi di un parti di siudat pa otro. Pa esei mester a paga e doño di e ponchi algu. Pa un luga na e punta dilanti di e boto akí bo no mester a paga, pasobra na e parti ei mayoria bia bo no ta keda seku. Ei e awa di laman ku ta spat kontra e boto por a muhabo.
E punta di e boto na papiamentu yama kabe’i boto i si bo ke bai ku un hende den outo òf trùk, semper bo por puntra pa un kabe’i boto. Maske ku esaki no tin nada ke ber ku nabegá òf ku un boto.
Tin un kantika den kua un señora ta negoshá ku e kapitan di un ponchi tokante e preis pa krusa bai otro banda. E kantika yama Ai mi dushi bunita kaptan.
X
Un kuarta ta un kitara chikitu. Un kitara normalmente tin 6 kuèrdè, un kuarta tin 4. Na Kòrsou bo ta haña hopi kuarta. Pasobra un kuarta ta chikitu, ta fásil pa move kuné i e no ta karu manera un kitara normal. E no ta difisil pa toka sinembargo bo mester praktika hopi riba dje.
Hopi hende na Kòrsou por kanta i toka kuarta pareu.
X
E kantika E baka pintá kisas ta e kantika na Papiamentu mas konosí na mundu, pasobra ta un kantante famoso di salsa a kant’é. Su nòmber ta Celia Cruz, prosedente for di Cuba, pero su ruman muhé tabata kasá ku un Yu di Kòrsou. E kansion ta trata un araña, ku ta demasiado astuto pa Shon Arei. E araña yama Nanzi i hopi di su kuentanan ta konosí na Afrika, Sürnam i Antia.
Mas abou por skucha e kansion akí, ku tin su vershon na Hulandes tambe. Thijs Borsten ta aktua komo Nanzi, e araña den e kansion. E ta pianista i kompositor i ta kolekshoná kantikanan di mucha di henter mundu. El a traha un buki di nan ku un CD. E buki yama De Liedjesatlas.
Thijs tabata asombrá ku ta tin tantu kantika asina na Papiamentu, aunke tin tiki hende so ta papia Papiamentu. El a haña asina tantu kantika bunita ku el a traha spesialmente un CD ku su buki ku únikamente kantika na Papiamentu. E yama Bon dia goeiemorgen i por hasi bo pedido aki.
Thijs:
‘Mi ta haña mashá interesante kon ta traha kantika di mucha rònt mundu. Entre nan tin komposishonnan bunita i eksepshonal. Kasi semper nan ta prèt. E kantika akí tokante e araña Nanzi di Kòrsou ta mashá prèt. E idioma ku nan ta papia ta mashá adekuá pa kantikanan alegre riba músika bailabel. E kansion yama "E baka pintá" i nos a tradusí esaki ku "De bonte koe".’
‘Un kuenta asina tokante Nanzi, e araña, ku for di Afrika a konkistá henter mundu, naturalmente ta fantástiko! Pa mi ta un onor ku mi tambe por sigui konta esei.’
X
Bo ta deseá di toka un instrumento den un orkesta grandi? Esei por! Puntra bo yùf òf mener pa bo wak serka e Orkesta di Ensayo (Leerorkest). Nan tin dosentenan di musika ku ta bishita skolnan. Nan tin un kantidat enorme di instrumento musikal. Bo mes por skohe kua bo ke toka. Huntu ku otro koleganan alumno, bo ta haña lès i bo ta hasi ensayo pa un konsierto di berdat. Tin bia bo ta toka músika klásiko, tin bia músika pòp òf músika di un pelíkula. E Orkesta di Ensayo (Het Leerorkest) tambe tin kantikanan di Bon Dia Goeiemorgen riba nan lista di repertorio. E ta parsé bo algu fantástiko?
Na Kòrsou tambe a lanta un Orkesta di Ensayo. Nan ta toka tur tipo di músika, entre otro un kantika di Izaline Calister.
E Orkesta di Ensayo, un programa musikal pa hasi muchanan mas fuerte i mas felis. E ta aktivo den e barionan di ménos entrada i ta traha den estrecho kooperashon ku skolnan i otro partnernan kultural i sosial. Den e Orkesta di Ensayo e mucha ta forma parti di un aventura musikal den kua e por krese. E muchanan ta siña toka un instrumento musikal i siña kon pa toka huntu ku otro den un orkesta. E ambiente positivo di e orkesta ta stimulá i yuda e mucha pa desaroyá i bira un siudadano global di futuro.
Kada mucha ta partisipá. E intenshon di e Orkesta di Ensayo ta ku e muchanan ta siña toka un instrumento musikal den kursonan di músika semanal serka dosentenan musikal profeshonal na nan propio skol di fundeshi, bou di ora di skol.
Nan por skohe entre instrumentonan musikal di e orkesta sinfóniko: fió, alto fió, cello, kontrabaho, arpa, flouta, klarinèt, hobo, fagòt, tròmpèt , trombon, kachu i instrumento di perkushon. Banda di e kursonan di músika semanal tin ensayonan den grupo i presentashonnan. Tambe tin (despues di skol) orkestanan pa esnan mas talentoso i trayektonan avansá.
