Tumba i tambu
Komo Kòrsou, Aruba i Boneiru ta islanan leu for di Hulanda, nan tin nan propio kultura. No únikamente nan tin nan propio idioma, sino tambe ritmonan di músika speshal, ku ta serka nan so bo por skucha. Na e diferente tiponan di músika ku nan ta toka, bo por tende ku e islanan a eksperiensiá influensia di henter mundu.
Tempu Hulanda a haña e islanan, no tabatin mashá hende bibá riba nan. Hulandesnan a kore ku kasi tur hende ku tabata biba einan ainda. For di e momentu ei, hendenan tabata bini di tur parti di mundu pa biba i traha. Tur e hendenan ei a trese nan propio tipo di músika. E músika ei no tabata riba CD òf Spotify, eseinan no tabata eksisti e tempu ei, no tabatin mikrofon, tokakasèt òf LP tampoko ainda (tin hende ku sa kiko e kosnan ei ta?). Ta p’esei nan no por a skucha kon tabata toka e músika eksaktamente i asina a traha nan propio variashon.
Afrikanonan, ku mester a traha komo katibu riba e islanan, a trese ritmonan afrikano. For di esakinan a surgi tambú, tumba i seú.
Komersiantenan riku na Kòrsou a trese tur sorto di produkto for di tur parti di mundu, pa nan dekorá nan kasnan kune. Hendenan ku kas grandi tabatin un piano i a trese fiónan na e isla. Asina nan a introdusí músika di baile for di Europa manera pòlka i wals.
Na Aruba a surgi un forma musikal ku yama dande. Meskos ku tambú na Kòrsou, ta toka dande na kambio di aña. Músikonan di dande marcha di porta pa porta, pa deseá e hendenan un felis aña nobo.
Den e videonan mas abou, tin un splikashon kon pa rekonosé e diferente ritmonan.
Tumba
Tumba ta un ritmo di baile ku ta swin, i ku hopi usá pa traha kansionnnan alegre. Tur aña tin un festival grandi na Kòrsou, Aruba i Boneiru, unda ta toka solamente kansionnan ku ritmo di tumba.
E Festival di Tumba ta tuma lugá semper algun siman promé ku Karnaval. Ta un kompetensia, na kua bo por partisipá solamente ku un kansion nobo, spesialmente komponé pa e festival. E kantante ku gana, ta bira Rei di Tumba. E ta haña un korona riba su kabes i den e simannan promé ku karnaval, e mester kanta e kansion ei tur kaminda ku e bai.
Izaline Calister a gana e festival akí algun aña pasá ku e kansion Sasa na Awasa, i a bira Reina di Tumba. E ta e di dos hende muhé ku a yega di gana Festival di Tumba. E promé reina ta e kantante popular Elia Isenia.
Dia Izaline a gana, tabatin mas ku 100 kantante maskulino i femenino ku a partisipá. Práktikamente tur hende di Kòrsou, Aruba i Boneiru ta soña di un dia por partisipá na Festival di Tumba i tur hende sa tokante kiko nan kansion mester trata. Hopi mucha ke bira Rei òf Reina di Tumba.
Danza
Despues di invento di bapor na siglo 19, hende a kuminsá biaha mas tantu, pasobra barkunan ya no tabata depende tantu di bientu mas. Hopi matros di Kòrsou a biaha rònt mundu i hopi nabegante i komersiante for di otro islanan den laman Karibe a yega haf di Willemstad. Nan a trese nan instrumentonan musikal i tabata toka musika di nan pais riba kaya. Asina a bini Kòrsou for di Spaña, via Cuba, contradanza. Den kurso di tempu e músika a adaptá un poko, na un forma típiko di Kòrsou, Aruba i Boneiru. Nos konosé e tipo di músika manera ta tok’é awor komo danza.
Wals
For di paisnan Oropeo a bini músika klásiko na Kòrsou. Den kurso di tempu e tiponan di músika akí a kambia poko i bira musika típiko pa Kòrsou, Aruba i Boneiru.
Músikonan di Kòrsou tabata toka e ritmonan manera nan ta haña ku por baila dushi riba dje i asina a kambia nan un poko. E diferensia prinsipal ta ku nan tabata usa nan instrumentonan di perkushon lokual no tabata sosode na Europa. Hopi bia tabata toka e músika riba instrumentonan simpel i trahá pa nan mes. Òf riba un kuarta, un katara chikitu ku tabata buska for di Venezuela. Tabatin hende tambe ku tabata komponé nan propio kansionnan. Asina a bini mas vershon di músika prosedente di Europa. Di tur e ritmonan ei te ainda ta toka e wals antiano i e pòlka. Mas di 150 aña despues.
Seu
Seú ta e músika ku tabata toka durante di kosecha di maishi, saká for di kunuku. Tabata un temporada importante di aña, pasobra awor e tempu di trabou duru a pasa. Kuido di pal’i maishi i traha den kunuku den higra di solo ta trabou pisá i tur hende ta kontentu ku a bolbe logra. Ta organisá un marcha pa hiba tapushi mangasina.
Nan tabata toka barí trahá di un barí di ròm i ta usa hèrmènt di traha den kunuku komo instrumento di perkushon. Nan tabata supla riba kachu di baka. Djis na e punta di e kachu ta bora un buraku riba kua bo ta primi bo lepnan i bo por supla diferente tono. E kachunan akí tabata usa tambe pa manda señal ku notisia di un plantashi pa otro. Aparte ku por supla e kachu, por a kanta den dje tambe i asina hasi e sonido mas duru. Asina por a manda mensahe di un plantashi pa otro riba e isla. Manera un ‘Whatsapp’ antikuá.
Ainda den e tempu akí ta tene marcha tur aña na luna di aprel riba e islanan, ora ta toka músika di seú.
Polka
For di paisnan Oropeo a bini músika klásiko na Kòrsou. Den kurso di tempu e tiponan di músika akí a kambia poko i bira musika típiko pa Kòrsou, Aruba i Boneiru.
Músikonan di Kòrsou tabata toka e ritmonan manera nan ta haña ku por baila dushi riba dje i asina a kambia nan un poko. E diferensia prinsipal ta ku nan tabata usa nan instrumentonan di perkushon lokual no tabata sosode na Europa. Hopi bia tabata toka e músika riba instrumentonan simpel i trahá pa nan mes. Òf riba un kuarta, un katara chikitu ku tabata buska for di Venezuela. Tabatin hende tambe ku tabata komponé nan propio kansionnan. Asina a bini mas vershon di músika prosedente di Europa. Di tur e ritmonan ei te ainda ta toka e wals antiano i e pòlka. Mas di 150 aña despues.
Tambu
Un ritmo hopi importante na Kòrsou ta tambú. Ta e músika di mas bieu di e isla, originalmente for di Afrika. Ta músika kantá, kompañá ku barí i otro instrumentonan di perkushon. Ta toka tambú den e dianan di fin di aña, anochi na lugánan kaminda hopi hende ta bai pa baila henter anochi. E tekstonan di e kansionnan mayoria biaha ta trata kosnan ku a sosode den polítika den e aña anterior. Tin biaha ta kritiká gobernantenan di e isla.
Pa motibu di e bailamentu fervoroso i tekstonan krítiko, gobièrnu hulandes di Kòrsou a prohibí tambú pa hopi tempu. Nan no tabata haña e bailamentu nèchi i no tabata ke pa e hendenan konta otro loke no ta agradá nan i e loke nan kier a protestá kontra dje.
E palabra tambú no ta nifiká solamente e ritmo, sino tambe e ta nomber di e instrumento di perkushon ku ta usa pa toka, i meskos nan ta yama tambe e evento durante kua hendenan ta bini huntu pa kanta i baila.
Tambú ta mas ku solamente músika, den e komunidat Kurasoleño e ta representá e resistensia kontra sklabitut i e opreshon durante siglonan di e gobièrnu hulandes.
Marcha
Músika di marcha tin su prosedensia di Europa i tabata usa esaki na paradanan militar. Músika di marcha no ta trahá pa baila, sino pa e sòldánan por marcha bon riba dje. Bo ta tende e ròfel riba e tambornan i e melodia alegre di e instrumentonan di bras ku ta animá e sòldánan.
Den siglo 19 kompositornan klásiko a krea músika di Marcha pa fiestanan militar i paradanan. Pa e motibu ei músika di Marcha a bira mas popular na okashonnan ofisial i na seremonianan militar. Bo ta rekonosé músika di Marcha tambe pasobra bandanan di harmoní, fanfare i ‘brassbands’ ta presentá esaki marchando riba kaya.
Merengue
Merengue ta bini for di Repúblika Dominikana, un pais riba un isla den laman Karibe. Pa motibu di e koriente i e direkshon di bientu, tabata nabegá hopi entre Kòrsou i e kapital Santo Domingo i asina merengue a bin Willemstad tambe. Merengue ta un baile di paso rápido ku a originá for di músika di Indjan i ritmonan afrikano. Promé ayá tabata toka e músika riba un tambora, un raspu di metal (guiro) i un sinfonia di man (accordeon).
Ku yegada di radio, 100 aña pasá merengue a bira mas popular i orkestanan a amplia ku mas perkushon, un baho, piano i supladó. E baile alegre i eksitante aki tin e konteo di 4 i e tambora ta indiká di forma kla inisio di e mat. P’esei merengue no ta difísil pa Europeonan baila.
Tango
Tango ta un baile suramerikano ku a originá na boka di un riu grandi, ku na spañó yama Rio de la Plata. Ei tin e kapitalnan di dos pais, Argentina i Uruguay en frente di otro. E kapitalnan ei tabata konektá na otro pa navegashon. Den e kafetaria i skolnan di baile den e hafnan, tabata bini eks-katibunan afrikano, cowboynan suramerikano i imigrantenan Oropeo tabata bini huntu pa skucha músika i baila. Tur tabata trese nan propio músika i ritmonan i for di eseinan a nase un forma di baile sensual ku nan a yama tango.
Un instrumento importante den tango ta e bandoneon. Ta un sorto di sinfonia di man (accordeon) ku nan tabata traha na Alemania i ku italiano i spañónan a trese Suramérika. Tango argentino a bira e estilo mas konosí i bailá rònt mundu. Na Kòrsou tambe.
