Djis kanta huntu ku Izaline C.

Izaline Calister ta un kantante i el a produsí 10 CD kaba. Tur ku kansionnan na papiamentu, idioma di su isla natal, Kòrsou. E ta duna konsiertonan na Hulanda i Kòrsou. Na Hulanda e ta konta semper algu tokante Kòrsou òf di kiko e kansionnan ta trata. Izaline ta duna lès na konservatorio na Arnhem i na Akademia di Teatro i Baile na Amsterdam.

Izaline ta konta:

‘Henter Hulanda mester haña e oportunidat pa sera konosí ku e kantikanan di mucha bunita den mi idioma materno. Ta p’esei mi a laga adaptá algun kantika na hulandes, asina ku hulandesnan tambe por siña konosé algu di e humor i kreatividat di papiamentu. Na mucha mi a kanta den kor di mucha i e kantikanan ku mi a siña e tempu ei, tabata e kuminsamentu di mi amor pa músika i kantamentu.’

‘Henter mi bida mi ta karga e kantikanan huntu ku mi. Semper mi a lamentá ku tabata asina difísil pa por a haña un bunita CD ku nan ariba. E kantikanan ta muchu bunita pa no kanta nan. Ta p’esei mi a traha un CD di nan. Pa duna e kantikanan ei e atenshon i e amor ku nan meresé i pa pasa nan pa un generashon nobo.’

A adaptá e kantikanan tambe na hulandes i Izaline ta kanta nan tantu na papiamentu komo na hulandes. Wak si bo por kanta huntu kuné den e videonan di ensayo, despues bo mes por purba tambe den e videonan di karaoke.